Por que é tan importante a coeducación?
A muller foi mostrada dende comezos remotos da historia como débil, submisa, incapaz de pensar por si mesma ou de facer cousas importantes, a que tiña que ser protexida polo home, permanecer no fogar para ser considerada una verdadeira “ señora”. Foi definida seguindo o patrón dos desexos e necesidades do outro sexo; e moitas mulleres así o fixeron inculcándolles estes mesmos valores ás súas fillas e fillos.
Nos nosos días, a muller conseguiu novos espazos e dereitos. Non obstante, se se observa criticamente a realidade podemos ver que persisten as desigualdades e a discriminación en función do sexo. No mercado laboral é maior o desemprego feminino; os postos de traballo ocupados por mulleres son, en xeral, menos valorados socialmente e menos retribuídos economicamente.
![facianas](/sites/default/files/inline-images/coeducacion_1.jpg)
De igual forma, as profesións de maior status social foron exercidas tradicionalmente por homes. Os postos directivos seguen ocupados na súa maioría por homes. Outro indicador da desvalorización da muller, e sen dúbida o máis alarmante, é a violencia nas súas diversas formas, exercida por homes contra as mulleres. De aí a importancia de contrarrestar esta realidade dende a educación, comezando no fogar e dende idades moi temperás do desenvolvemento.
Consellos para coeducar e coeducarnos
- Utilizar unha linguaxe que represente ambos sexos
- Ampliar as oportunidades educativas e formativas de todas as persoas
- Dar o mesmo valor ao feito de ser home ou muller
- Promover o acceso das nenas, en igualdade de condicións, a todas as formas de cultura, coñecementos, actividades, recursos, xogos, deportes, etc aos que teñen acceso os nenos
- Modificar a distribución de poder nos centros de modo que os cargos directivos e de toma de decisións tendan a ser paritarios entre mulleres e homes
- Saber coidarse e apoiar a outras persoas
- Afrontar os conflitos mediante o diálogo
- Coidar as relacións, prestando atención ás necesidades, opinións, sentimentos alleos, pero sen perder de vista os propios
- Elaborar o proxecto de vida, en función dos desexos e capacidades propios, e non segundo estereotipos ou prexuízos sexistas
- Previr os malos tratos e a violencia de xénero.
RECURSO "Obradoiros de sensibilización e formación en igualdade"
PROGRAMA : Atención á muller
DESCRICIÓN: Sensibilizar e fomentar un cambio de mentalidade e de valores entre o persoal do Concello acorde co principio de igualdade entre homes e mulleres a través do desenvolvemento dun programa formativo.
OBXECTIVOS:
- Proporcionar coñecementos básicos sobre o sistema sexo/xénero contextualizando o tema da igualdade dende esta perspectiva de análise.
- Proporcionar coñecementos sobre o marco lexislativo no que se desenvolve o concepto de igualdade de xénero e as políticas de igualdade.
- Fomentar a reflexión e o debate en torno ás cuestións de xénero, posibilitando con iso o cambio de actitudes con respecto á cuestión da incorporación e posta en marcha das políticas de igualdade.
- Achegar criterios que permitan analizar a realidade dende unha perspectiva de xénero atendendo así as diferenzas entre mulleres e homes e as desigualdades que presentan.
- Potenciar o interese do persoal con responsabilidade técnica para detectar necesidades e introducir diferentes accións positivas no desenvolvemento das súas tarefas.
LUGAR DE UTILIZACIÓN: centros escolares e centros cívicos sociais
DESTINATARIOS: toda a comunidade educativa, homes e mulleres
GRUPOS MÁXIMOS: 12 persoas
DATAS: de novembro a xuño
HORARIO: dúas sesións de dúas horas
SOLICITUDE INSCRICIÓN: No Rexistro Xeral do Concello en formulario oficial
PRAZO: Consonte convocatoria.