O alcalde entrega un pergamiño á Escola Rural de Sedes tralo recoñecemento plenario ao centro.
O alcalde de Narón, José Manuel Blanco, presidiu esta mañá o acto de entrega dun pergamiño á directora da Escola Rural de Sedes (integrada no Colexio Rural Agrupado), Cristina Fernández.
O agasallo recoñece a labor realizada nos últimos 95 anos desde a Escola Rural de Sedes, centro ao que co gallo dos actos do Día Internacional da Muller a corporación local aprobou por unanimidade –no pleno do pasado mes de febreiro- distinguir polo seu traballo a prol da loita pola igualdade de oportunidades entre mulleres e homes a través da educación, como “Escola Pioneira na Igualdade de Oportunidades entre Mulleres e Homes”, tal e como recordou o rexedor local.
Acudiron á convocatoria a concelleira de Igualdade, Teresa Sabio, os portavoces municipais de TEGA, Marián Ferreiro; PP, Marcos López e PSOE, Catalina García, así como familiares dos sete nenos e nenas matriculados na actualidade neste centro.
“Nós consideramos a importancia deste tipo de escolas rurais para manter a poboación”, asegurou Sabio, que destacou o servizo que prestaron e prestan aínda na actualidade ás familias as escolas rurais.
O alcalde apuntou en referencia ao servizo que “o que naquel momento era algo moi novidoso, hoxe xa é algo natural e nós desde o Concello intentaremos continuar apoiando cos nosos medios a estas escolas. Aquí hai unha iniciativa moi importante detrás, e iso é o fundamental”.
Blanco procedeu a ler o texto do pergamiño aos asistentes ao acto, entre eles os nenos e nenas matriculados este curso no centro, aos que a directora preguntou onde querían colocar o pergamiño. No texto lémbrase que o filántropo oriundo de Sedes Francisco Sabín Teijeiro mercou no ano 1921 o edificio de Freixido, no que se localizan as instalacións, para convertelo en Escola de Nenos e Nenas. O centro mantén ese espírito inicial cumpridos 95 anos desde a súa fundación, baseándose “na funcionalidade de educar e instruír na igualdade de oportunidades”. Así mesmo, no documento incídese en que a viabilidade das instalacións “está xustificada non só pola súa vocación primitiva de formación, senón en tanto en canto é motor que pode facilitar unha mellor calidade de vida na zona rural á que está adscrita, coadxuvando á fixación de poboación e como elemento dinamizador das familias”.
Á Escola Rural de Sedes asisten nenos e nenas de entre 3 e 5 anos e para o vindeiro ano conta cun total de cinco matrículas, tal e como apuntou a directora do centro, que agradeceu a distinción concedida desde a corporación local de Narón.